Зоосон ширээ сүлжих урлаач Ж.Цэрэндэжид нь ээжээсээ энэхүү өвийг өвлөн авсан ба одоо охин Ж.Батцэцэг, Ж.Батзаяа нарт зааж сурган гэр бүлээрээ энэхүү өв соёлоо тээн хадгалж буй өвлөн уламжлагч нар юм.

Монгол үндэсний хувцас, хөөрөгний даалинг зүү ороох оёдлын адил оёж чимэглэхэд зоос ширээний сүлжмэл туузыг хэрэглэдэг бөгөөд олон өнгийн утастай ээрүүлийг ишинд жин тэнцүүлсэн зоостой дугариг суурийн ирмэг дагуулан сөөлжүүлж тавин сүлжих монгол ардын нэхмэл хатгамлын урлал юм.