1
1
9
Орон нутагт соёл урлагийн хүртээмж, чанар үйлчилгээг сайжруулах зорилготой улсын хэмжээнд өрнөж буй “Соёлын сэргэлт-2023” аяны үйл ажиллагаа Дархан-Уул аймагт энэ сарын 23-ны өдөр болно.
“Кинонд ээлтэй хот” уриан дор зохион байгуулах бөгөөд тус өдөр хүндэтгэлийн тоглолт, соёл, гэгээрлийн лекц, илтгэл, соёлын бүтээлч үйлдвэрлэлийн болон соёлын биет бус өвийн үзэсгэлэн, номын өдөрлөг, соёлын салбарын алба хаагчдад чиглэсэн чадавхжуулах сургалтууд болох ажээ.
Соёлын сэргэлт аяны нээлтийн өдөр МУГЖ дуучин Б.Сарантуяа болон “Анир” поп оркестрын уран бүтээлчид “Хүндэтгэлийн тоглолт”-ыг Дархан-Уул аймгийн иргэдэд өргөн барина.
Залуучууд театрын хоёрдугаар давхарт аймгийн соёлын байгууллагууд болон зохиолчид, зураач, урчууд, уран хатгамалчид, монгол уран бичлэг, ургийн бичиг зэрэг соёлын биет бус өвийг өвлөн уламжлагчид, соёлын бүтээлч үйлдвэрлэгчдийн нээлттэй үзэсгэлэн толилуулахаар болжээ.
Түүнчлэн кинонд ээлтэй хот болох зорилтын хүрээнд аймгийн Соёл, амралтын хүрээлэнд байрлах “Гарын таван хуруу” киноны зураг авалт хийсэн хэсгийг “Кино орон зай” болгон тохижуулах төслийн танилцуулах уулзалтыг зохион байгуулахаар төлөвлөжээ.
Мөн өнгөрсөн хавар зураг авалт хийсэн Японы олон ангит “Вивант” киноны нээлт “Дархан Өргөө” кино театрт болох ажээ.
Баасан гарагт “Тэнгэрийн заадас” хөрөг номын зохиолч Ж.Буд-Эрдэнэ болон тус номд орсон Хөдөлмөрийн баатар, Ардын жүжигчин УГЗ, кино найруулагч Г.Жигжидсүрэн, Монгол Улсын Ардын зураач, УГЗ, шог зураач Ц.Байды, МУСГЗ, сэтгүүлч, зохиолч Ш.Ёолк нар Залуучууд театрын их танхимд зохиолч, уншигчийн уулзалтыг зохион байгуулах юм.
“Соёлын сэргэлт-2023” аяны хүрээнд соёлын салбарын ажилтнуудыг чадавхжуулах, мэргэжил арга зүйн болон олон нийтэд зохион байгуулах сургалтууд болох ажээ. Тухайлбал дроны зураг авалт, кино зохиолын сургалт, киноны орлон тоглогчийн сургалт, Музейн албан хаагчдыг чадавхжуулах арга зүй, номын санчдыг чадавхжуулах арга зүй, биеийн хөдөлгөөнөөр ярихуй, тайзан дээрх биеийн хөдөлгөөний нарийн ажиллагаа сэдвээр чадавхжуулах театрын сургалтуудыг тус тус зохион байгуулахаар төлөвлөжээ.
