1
1
9
“Соёлын бүтээлч сар” аяны хүрээнд Боловсролын тэргүүний ажилтан, Монгол Улсын Соёлын Тэргүүний ажилтан, Хөгжмийн багш Ж.Гүндэгмаагийн санаачилгаар Дархан-Уул аймгийн 15 дугаар сургуулийн нэрэмжит “Полифони” хоршил болон хамтлаг дуучдын улсын уралдаан 2023 оны 11 дүгээр сарын 10-ны өдөр боллоо. Тус уралдааныг зохион байгуулахад Залуучууд театр хамтран ажиллалаа.
Тус тэмцээн нь анх эхэлснээс хойш 14 дэх удаагаа, Улсын хэмжээнд 6 дахь удаагаа зохиогдож байгаа бөгөөд шүүгчээр СУИС-ийн хүндэт профессор Б.Оюунхишиг, МУБИС-ийн ахлах багш Ц.Эрдэнэтуяа, хөгжмийн багш МУСТА Ж.Ариунтуяа нар ажилласан юм.
Тус уралдааныг 5 насны ангиллаар дуэт, квартет гэсэн 2 төрлөөр зохион байгуулж Говьсүмбэр, Дорноговь, Өвөрхангай, Улаанбаатар, Дархан-Уул аймаг, хотын нийт 28 багш, 238 хүүхэд авьяас чадвараа уралдуулан идэвхтэй оролцов.“Полифони” хоршил болон хамтлаг дуучдын улсын уралдаанд амжилттай оролцсон хүүхдүүдийг 1, 2, 3 дугаар байр эзлүүлэн алт, мөнгө, хүрэл медаль, өргөмжлөл, мөнгөн шагналаар шагнаж урамшууллаа. Мөн сурагчдаа амжилттай бэлтгэсэн багш нарыг ч алдаршуулсан юм.
Монгол Улсын Засгийн газрын тогтоолоор батлагдсан “Сонгодог урлаг” Үндэсний хөтөлбөрийн хүрээнд анх зохион байгуулагдаж байсан “Полифони” уралдаан 6 дахь удаагаа улсын хэмжээнд зохион байгуулагдаж байгааг уралдааны эхэнд онцолж байлаа.
Хүүхэд багачуудын дуу хөгжмийн боловсрол, ур чадварыг дээшлүүлэх, дуулах урлаг болон олон хоолойн ур ухааныг эзэмшүүлж мэргэжлийн чиг баримжаа олгох, нийтэд сонгодог урлагийг сурталчилдаг уламжлалт тэмцээнээ амжилттай зохион байгуулсан Ж.Гүндэгмаа багшдаа Дархан-Уул аймгийн Соёл, урлагийн газар, хамт олноос #Талархал илэрхийлье. #Баярлалаа
